Якія прафесіі найбольш запатрабаваныя ў Беларусі, распавялі ў Мінпрацы

На сённяшні дзень у банку вакансій – 137 тысяч прапаноў.

Першы намеснік міністра працы і сацыяльнай абароны Таццяна Астрэйка ў інтэрв’ю газеце «Рэспубліка» распавяла пра сітуацыю на рынку працы Беларусі.

У агульнарэспубліканскім банку вакансій – 137 тыс. прапаноў. З іх 70% – рабочыя спецыяльнасці.

Больш за ўсё патрэбныя кіроўцы (7,3 тыс. вакансій), прадаўцы (2,8 тыс.), электраманцёры (2,7 тыс.), трактарысты (2,3 тыс.) і ўрачы (2,3 тыс.).

Таксама высокі попыт на інжынераў – 1,1 тыс. вакансій, бухгалтараў – 1,1 тыс., ветэрынарных урачоў і майстроў – па 800 вакансій.

Паводле слоў Таццяны Астрэйка, сістэма адукацыі падстройваецца пад рынак: пашыраецца набор на інжынерныя спецыяльнасці і спецыяльнасці сельскай гаспадаркі.

Забеспячэнне кадрамі

Усяго ў эканоміцы занята 4,2 млн чалавек. Больш за 60% задзейнічана ў сферы паслуг (гасцінічны бізнес, грамадскае харчаванне, дзелавыя паслугі, IT, гандаль, індустрыя забаў).

Каля паловы працуючых – «сінія каўнерыкі» (фізічная і кваліфікаваная ручная праца).

Агульнае забеспячэнне наймальнікаў кадрамі складае 96,6%. У IT-сферы гэты паказчык дасягае 98,9%.