Знайсці Цмока і пагасціць у каралевы Боны: поўная афіша фестывалю «Кліч Палесся»

Аграгарадок Ляскавічы ў Петрыкаўскім раёне на адзін дзень – 15 жніўня – ператворыцца ў сталіцу этнакультурных традыцый.

Дадаць у асноўныя
крыніцы Google

На фестывалі «Кліч Палесся» будуць шукаць Цмока, знаёміцца з абрадамі і рамёствамі палешукоў, частавацца хатнімі далікатэсамі і правяраць, хто лепш танцуе і спявае – госці або мясцовыя калектывы.

Times.by падрыхтаваў поўную афішу фестывалю.

Жаночы голас Палесся

Фестываль па традыцыі пройдзе на тэрыторыі Нацыянальнага парку «Прыпяцкі». На 9 гектарах уздоўж ракі вырасце вялікая Палеская вёска, дзе кожны з 13 падворкаў прадставіць пэўны раён Гомельскай і Брэсцкай абласцей. Гаспадары падворкаў раскажуць аб кухні, касцюмах і рамёствах.

У гэтым годзе фестываль прысвецяць жаночаму голасу Палесся, таму ў цэнтры ўвагі апынуцца жанчыны: гераіні фальклору, гістарычныя асобы і таленавітыя сучасніцы.

«У кожнага раёна будзе свая гераіня і свая гісторыя. У хайнічан на падворку будзе гаспадарнічаць Ганна Чарнушка са знакамітай трылогіі Івана Мележа «Палеская хроніка». На пляцоўцы пінчан гасцей чакае сустрэча з легендарнай Бонай Сфорца, чые эканамічныя і культурныя рэформы пераўтварылі Палессе. Машына часу будзе працаваць і на падворку Петрыкаўскага раёна – тут да гасцей выйдзе Сафія Слуцкая – апошняя княжна са славутага роду Алелькавічаў-Радзівілаў», – прывяла некалькі прыкладаў намеснік начальніка галоўнага ўпраўлення культуры Гомельскага аблвыканкама Настасся Лысенка.

А каб знаёмства атрымалася не вельмі афіцыйным, гасцей запросяць на дэгустацыю традыцыйных страў. Магчыма, менавіта за палескай бульбай, дранікамі і іншымі мясцовымі прысмакамі высветліцца, чый падворак самы-самы.

Цмок бліжэй, чым здаецца

Яшчэ адна навінка фестывалю – квест «У пошуках Цмока». Імя беларускага Змея Гарыныча паходзіць ад беларускага дзеяслова «смактаць». Але палескі Цмок больш сімпатычны і добры, а яшчэ ён абаронца справядлівасці: бедным дапамагае, прагных карае.

«Цмоказнаўцы сцвярджаюць, што персанаж з добрымі маральнымі прынцыпамі ўсё яшчэ насяляе маладаступныя, але казачна прыгожыя вадаёмы Палесся. Удзельнікам трэба будзе раскрыць таямніцу лясных балот – выканаць заданні на кемлівасць і знайсці доказы, што Цмок існуе», – растлумачыла сутнасць квеста Настасся Лысенка.

У фінале гульні запланавана сустрэча з самім Цмокам – калі, вядома, ён не перадумае і не вырашыць схавацца лепш.

Галоўная сцэна

Цырымонія адкрыцця фестывалю пройдзе на галоўнай сцэне з прэзентацыяй гімна аўтарства галоўнага рэжысёра «Клічу Палесся» Аляксандра Бандарэнкі і ўзнагароджаннем ганаровых палешукоў.

«Гэта званне прысвойваюць з 2014 года за вялікі асабісты ўклад у сацыяльна-эканамічнае развіццё Палескага рэгіёну. У розныя гады ганаровымі палешукамі станавіліся кіраўнік дзяржавы Аляксандр Лукашэнка, музыкант Міхаіл Фінберг, алімпійскі чэмпіён Раман Петрушэнка», – нагадала прадстаўнік аргкамітэта.

На працягу дня на сцэну будуць падымацца лепшыя калектывы Гомельскай і Брэсцкай абласцей, а таксама запрошаныя артысты з Расіі. У 18:30 узнагародзяць удзельнікаў фестывалю, а з 19:00 да 21:00 тут пройдзе фінал конкурсу прыгажосці і грацыі «Палеская Прыгажуня – 2026».

Традыцыі і новыя фарматы

Фестывальныя пляцоўкі будуць працаваць з 11:00 да 23:00. Арганізатары раяць абавязкова пабываць у рамеснай слабадзе, пазнаёміцца з унікальным побытам і ўкладам жыцця палешукоў. Тут пакажуць як музейныя экспазіцыі, так і творы сучасных майстроў: ганчароў, разьбяроў па дрэве і прадстаўнікоў іншых народных рамёстваў.

Увесь фестывальны дзень на набярэжнай будуць працаваць палявы кінатэатр, гастранамічныя рады і, вядома, выстава-кірмаш, дзе ніякіх кітайскіх сувеніраў – усё толькі самабытнае.

Арганізатары падрыхтавалі і новыя фарматы: сямейную пляцоўку народных гульняў, цырк шапіто з праграмай «Таямніцы Малімона», а таксама батлеечныя спектаклі і майстар-класы па стварэнні мініяцюрных кніг.

У самым парку «Прыпяцкі» будуць арганізаваны водныя экскурсіі, прагулкі на цеплаходах. Катары будуць адпраўляцца на паўгадзінныя прагулкі, цеплаходы – на гадзінныя, кожны змяшчае да 50 турыстаў. На спецыяльным паравозіку можна наведаць сафары-парк.

Увечары гасцей чакае мясцовы аналог дыскатэкі – народная танцавальная вечарына «КаверХорШоу» з удзелам калектываў, якія перапяваюць поп-зорак на народны манер. Хэдлайнерамі гэтай часткі фестывалю стануць смелы эксперымент з Масквы «Казакі робяць хіты» і шоу-аркестр з Курска «Рускі стыль».

Уваход на ўсе пляцоўкі фестывалю, за выключэннем паслуг нацпарку «Прыпяцкі», свабодны.

Як дабрацца і дзе пераначаваць

Даехаць да Ляскавічаў можна будзе на дадатковых аўтобусах з Петрыкава і Жыткавічаў. Яны будуць курсіраваць кожную гадзіну з 10:00 да 00:00.

На жаль, магчымасці нацпарку абмежаваныя: жыллёвы фонд складае ўсяго 120 месцаў, таму большасць гасцей фестывалю прыязджаюць на адзін дзень. Тым не менш пераначаваць можна ў палатачным лагеры, які разгорнецца каля асноўнай пляцоўкі ў Ляскавічах.