Арына Сабаленка адкрыла корты ў Мінску

Першая ракетка свету правяла майстар-клас і расказала пра свой ідэальны дзень.

Як анансаваў Times.by, у Мінску ў завулку Казлова з'явілася новая тэнісная лакацыя Tigerhood х FIRST&RED.

На тэрыторыі школы №86, дзе вучылася і пачынала свой спартыўны шлях Арына Сабаленка, пабудавалі два сучасныя грунтавыя корты. Іх канцэпцыя і дызайн натхнёныя характарам тэнісісткі: сілай, грацыяй і вобразам тыгрыцы, які даўно стаў сімвалам спартсменкі.

Першая ракетка свету прыехала на адкрыццё кортаў.

Арына Сабаленка перад урачыстым адкрыццём кортаў адзначыла, што рада бачыць столькі дзяцей, і падзякавала мэру Мінска Уладзіміру Кухараву за падтрымку ідэі стварэння новых кортаў.

«Я ж пачынала тут, у школе «Змена», і прайшла ўвесь шлях, дайшоўшы да самай вяршыні. Спадзяюся, усе гэтыя прыгожыя корты дапамогуць нарадзіцца новым зоркам, якія будуць пакараць вяршыні тэніса – разам са мной, пасля мяне (смяецца). Яшчэ раз вялікі дзякуй усім. Спадзяюся, што ўсё гэта дапаможа «Змене» і дзецям стаць лепшымі, пакараць свет», – сказала спартсменка.

Уладзімір Кухараў у сваю чаргу ўпэўнены, што новыя корты будуць садзейнічаць папулярызацыі тэніса: «Змена» дала дарогу ў жыццё многім спартсменам. У тым ліку першай ракетцы свету Арыне, якая праслаўляе нашу краіну на сусветных арэнах».

Далей быў майстар-клас ад Арыны. Яна на корце працавала з мікрафонам і шмат падказвала юным тэнісістам: «Хутчэй рухай ножкамі», «Раней размах», «Асцярожна, траўмы нам сёння не патрэбны».

У майстар-класе паўдзельнічаў вядомы па гульні за БАТЭ і зборную Беларусі футбаліст Дзмітрый Бага.

– Класная падзея для нашага горада і краіны. Арына – суперзорка, нумар адзін у жаночым тэнісе. Радуе, што тут шмат дзяцей, – сказаў Бага карэспандэнту Times.by.

– Футбалісты ж часта гуляюць у тэніс.

– Асабіста я не. Я спрабаваў раней, але здалося, што цяжкі від спорту. Нядаўна стаў гуляць у падэл-тэніс, там прасцей. Цяпер буду на майстар-класе з Арынай. Пару разоў сетку перакіну.

– На тваім месцы хацелі б быць мільёны.

– Так, трэба цаніць гэта. Таму ёсць мандраж.

Адным з заданняў для ўдзельнікаў было зрабіць падачу з маскай для сну.

«А які прыз пераможцу?» – пацікавілася Арына. Пачула, што гэта мяч з яе аўтографам, усміхнулася: «Можна было б і нешта большае».

Тэнісістку спыталі, якім яна ўяўляе свой ідэальны дзень.

«Прачнуцца максімальна позна. Для мяне гэта прыкладна ў 11 гадзін. Смачнае дамашняе снеданне, добрая кава, час з сям'ёй і сябрамі. Ды і ўсё. Часам менавіта такія простыя моманты робяць дзень ідэальным», – прызналася спартсменка.

«Столькі настальгіі, столькі добрых успамінаў, натхняльных эмоцый, радасці. Душэўнае мерапрыемства, рада зноў аказацца дома. Падыхаць дамашнім паветрам, паразмаўляць з сябрамі, з якімі даўно не бачылася. Пабыць у школе, дзе ўсё пачыналася і дзе мне вельмі дапамаглі. Гэта мерапрыемства – энергетычны буст. Спадзяюся, і дзеці зарадзіліся», – падзялілася эмоцыямі Арына.

Першая ракетка адзначыла, што праводзіць майстар-клас не так проста: «Цяжка ўсім удзяліць увагу ў роўнай ступені. Таксама як адначасова гуляць і спрабаваць дапамагчы дзецям. Шмат энергіі забірае. Але я рада. Спадзяюся, атрымалася аддаць часцінку сябе кожнаму».

Свае парады дзецям спартсменка сфармулявала так: «Вера ў сябе, цяжкая работа, стопрацэнтная самааддача. І разуменне таго, што ўсё рэальна, усяго можна дабіцца».

Арына ўпэўнена, што ўсе магчымасці свету будуць перад нагамі тых, хто на сто працэнтаў аддаецца любімай справе, працуе не пакладаючы рук.

«Гэта толькі пачатак дапамогі школе «Змена». Яшчэ куча ідэй і праектаў. Спадзяюся, дапаможам стварыць максімальна камфартабельныя ўмовы дзецям, каб тут раслі будучыя чэмпіёны», – сказала Арына Сабаленка на заканчэнне.