Чаканне свята: зборная Беларусі па футболе рыхтуецца да гульняў у Мінску

Наперадзе ў каманды Віктара Ганчарэнкі два таварыскія матчы – галоўны трэнер расказаў пра падрыхтоўку і моцныя бакі сапернікаў.

Зборная Беларусі па футболе правядзе на сваім полі два таварыскія паядынкі. У апошні час такое здараецца рэдка. Як правіла, «белакрылыя» арганізоўвалі спарынгі з камандай Расіі. На гэты раз у Мінск прыедуць зборныя Сірыі (матч 5 чэрвеня) і Буркіна-Фасо (9 чэрвеня).

Нацыянальная каманда ўжо сабралася і пачала падрыхтоўку да гульняў. Карэспандэнты Times.by пабывалі ў размяшчэнні зборнай.

Галоўны трэнер Віктар Ганчарэнка сваю работу каля руля зборнай пачаў з дзвюх сакавіцкіх перамог над Кіпрам і Арменіяй. Цяпер у яго першыя матчы перад сваімі заўзятарамі.

«У нас прыўзняты настрой. Ёсць чаканне свята. Мы нядаўна бачылі фінал Кубка Беларусі. Была цудоўная атмасфера на стадыёне. Спадзяёмся, што і на матчах зборнай будзе поўная арэна. Значыць, будуць і кіпячыя эмоцыі. Паспрабуем зрабіць усё магчымае, каб людзі пайшлі са стадыёна з добрым настроем. На жаль, так атрымліваецца, што нашы заўзятары бачаць каманду толькі ў гэтай чэрвеньскай паўзе. Таму нам трэба зрабіць усё магчымае для таго, каб добра выступіць і падарыць людзям свята», – сказаў трэнер.

Ганчарэнка адзначыў, што Сірыя і Буркіна-Фасо – разнапланавыя каманды, але сур’ёзныя па сваім узроўні. І матчы па змесце не будуць адрознівацца ад сакавіцкіх гульняў з Кіпрам і Арменіяй.

«Аб Сірыі магу сказаць так: вельмі добрая арганізацыя гульні як у атацы, так і ў абароне. Бачна работа іспанскага трэнера. Яны добра і правільна абараняюцца. Таксама могуць вялікімі сіламі ісці наперад. Зразумела, што ў любой схеме, сістэме можна нейкія недахопы знайсці. Будзем гэта рабіць. У Буркіна-Фасо ў большай ступені выдзяляюцца індывідуальныя якасці, якія вельмі моцныя ў кожнага іграка. Там кожны футбаліст умее працаваць з мячом, здольны захаваць мяч пад націскам і накіраваць атаку наперад. Паводле нашых ацэнак, будуць два розныя матчы», – сказаў Віктар Ганчарэнка.

Галоўны трэнер адзначыў, што ў складзе зборнай практычна ўсе, каго хацелі бачыць. Толькі абаронца мінскага «Дынама» Раман Бегуноў атрымаў траўму.

Абаронца «МЛ Віцебск» Захар Волкаў расказаў аб атмасферы ў камандзе.

«Зразумела, станоўчыя эмоцыі – гуляем дома. Хочам, каб прыйшло як мага больш заўзятараў. Трэба парадаваць іх добрай гульнёй і перамогай. Цяпер лёгкіх гульняў не бывае, кожны сапернік моцны па-свойму. Будзем разбіраць, глядзець, рыхтавацца. У нас дзве таварыскія гульні. Трэба найграваць сувязі. Ёсць новыя хлопцы. Для іх тут новыя патрабаванні, новы трэніровачны штаб. Важна падысці да афіцыйных гульняў у аптымальнай форме», – сказаў Захар Волкаў.

Яшчэ на выхадных кіпелі эмоцыі ў туры чэмпіянату Беларусі па футболе. А цяпер ігракі мінскага «Дынама», «МЛ Віцебск», гродзенскага «Нёмана» і іншых клубаў разам у нацыянальнай зборнай.

«Так, абмяркоўваем, падхвальваем адзін аднаго, але ў жартоўнай манеры. Што іменна? Гэта ўнутраная кухня», – усміхнуўся Волкаў.

У красавіку Times.by даведаўся, на якіх прынцыпах арганізуе сваю работу галоўны трэнер зборнай Беларусі па футболе Віктар Ганчарэнка.