Донарскія акцыі праходзяць у Мінску з 1 па 14 чэрвеня

Кульмінацыяй акцый стане святкаванне Сусветнага дня донара крыві.

Акцыі, накіраваныя на папулярызацыю донарства крыві, стартавалі ў Мінску 1 чэрвеня і працягнуцца да 14 чэрвеня – Сусветнага дня донара крыві.

У бягучым годзе марафон праходзіць пад дэвізам: «Адна кропля чалавечнасці – здайце кроў, уратуйце жыццё».

Яго галоўная мэта – падзякаваць донарам за ўклад у ратаванне чалавечых жыццяў, а таксама нагадаць грамадству, што рэгулярныя данацыі неабходны для падтрымання нязніжальнага і даступнага рэзерву крыві, піша агенцтва «Минск-Новости».

Сферу трансфузіялогіі ў Беларусі рэгулюе спецыяльны дакумент: закон «Аб донарстве крыві і яе кампанентаў» рэгламентуе бяспеку працэдур, а таксама меры заахвочвання для тых, хто дзеліцца крывёю бескарысліва, у тым ліку ўзнагароджанне нагрудным знакам узнагароды Міністэрства аховы здароўя «Ганаровы донар Рэспублікі Беларусь».

Гэта званне гарантуе донарам шэраг прэферэнцый і сацыяльных ільгот, уключаючы штомесячныя даплаты да пенсіі, зніжэнне кошту платных медыцынскіх паслуг у дзяржустановах аховы здароўя на 20%.

Рэгулярнае донарства патрабуе захавання прынцыпаў здаровага ладу жыцця. Далёка не ўсе могуць патрапіць у спіс пастаянных донараў з-за высокіх медыцынскіх патрабаванняў.

Раней Times.by сустрэўся з ганаровымі донарамі крыві і даведаўся, як пачынаўся іх шлях. Напрыклад, інструктара трэнажорнай залы Юрыя ўразіла гісторыя аўстралійца Джэймса Харысана, плазма якога ўратавала жыцці больш як 2 млн нованароджаных.