Народнай артыстцы Беларусі Людміле Бржазоўскай 4 чэрвеня магло б споўніцца 80 гадоў

Памяці легендарнай балерыны прысвецяць гала-канцэрт фестывалю «Балетнае лета ў Вялікім».

Зорцы беларускага балета Людміле Бржазоўскай 4 чэрвеня спаўняецца 80 гадоў. Памяці легендарнай балерыны будзе прысвечаны гала-канцэрт, які завершыць фестываль «Балетнае лета ў Вялікім» 14 чэрвеня.

Людміла Бржазоўская першай у гісторыі рэспублікі атрымала званне Народнай артысткі БССР у 29 гадоў. Яе параўноўвалі з Одры Хэпбёрн і Маяй Плісецкай, знакамітыя рэжысёры захапляліся ёю, а скульптар Заір Азгур называў яе «творам мастацтва».

Прыма-балерына нарадзілася ў сям’і вядомага мастака Генрыха Бржазоўскага і яшчэ ў дзяцінстве звязала сваё жыццё з харэаграфічным мастацтвам. У Вялікі тэатр оперы і балета яна прыйшла ў 1966 годзе і выступала на яго сцэне больш за 20 гадоў.

Людміла Бржазоўская была галоўнай музай і суаўтарам вялікага харэографа Валянціна Елізар’ева, які ўзначаліў мінскую балетную трупу ў 1973 годзе. З таго моманту Людміла Генрыхаўна была першай выканаўцай цэнтральных партый ва ўсіх яго знакавых балетах: Евы ў спектаклі «Стварэнне свету», Фрыгіі ў «Спартаку» і г.д. А ролю Кармэн у пастаноўцы «Кармэн-сюіта» Елізар’еў наогул ствараў спецыяльна пад Бржазоўскую.

У той жа час прыма-балерына выконвала вядучыя партыі і ў класічным рэпертуары тэатра, у тым ліку Жызель у аднайменным балеце, Адэты-Адыліі ў «Лебядзіным возеры», Кітры ў «Дон Кіхоце», Аўроры ў «Спячай прыгажуні».

У 1988 годзе яна пакінула сцэну, але не тэатр. Да канца свайго жыцця яна працавала педагогам-рэпетытарам у Вялікім і выхавала шэраг маладых артыстаў. Сярод яе вучаніц – народныя артысткі Беларусі Вольга Гайко, Людміла Кудраўцава і Ірына Яромкіна.

Людміла Бржазоўская пайшла з жыцця 6 снежня 2023 года ва ўзросце 77 гадоў. Яна пахавана на Усходніх могілках у Мінску.

Вялікі тэатр захоўвае памяць аб актрысе, і ў гэтым годзе зоркі беларускага балета дадуць канцэрт, які стане яркай завяршальнай кропкай фестывалю «Балетнае лета ў Вялікім» 14 чэрвеня.

У гала-канцэрце прымуць удзел запрошаныя госці, у тым ліку Аксана Скорык і Леа Тамасон з Марыінскага тэатра (Санкт-Пецярбург), Берфу Эльмас і Батур Бюклю са Стамбульскага дзяржаўнага тэатра оперы і балета (Турцыя), а таксама расійскі танцоўшчык, харэограф і рэжысёр Аляксандр Магілёў.