Рэдкі грыб знойдзены ў Белавежскай пушчы – больш нідзе ў Еўропе яго няма

Унікальны грыб расце толькі на старых пладовых целах чырванакніжнай губы ружовай.

Дадаць у асноўныя
крыніцы Google

Вучоныя выявілі ў Белавежскай пушчы буйнейшую папуляцыю рэдкага ў Еўропе грыба, паведамілі ў прэс-службе нацыянальнага парку.

«Геаграфічны статус Osteina rhodophila ўнікальны: на сённяшні дзень у Еўропе гэты від не зафіксаваны нідзе, акрамя Белавежскай пушчы», – звярнулі ўвагу спецыялісты з нацпарку.

Бліжэйшае месца, дзе гэты грыб расце яшчэ, – лясное Паволжа Расіі.

А ў пушчы выяўлена ўжо 14 месцаў, дзе можна сустрэць Osteina rhodophila.

«Такая высокая шчыльнасць папуляцыі тлумачыцца строгім рэжымам запаведнасці Белавежскай пушчы. Osteina жыццёва неабходны буйнамерны яловы буралом позніх стадый гніення, ужо заселены губой ружовай, а таксама стабільны мікраклімат», – растлумачылі вучоныя.

Любыя віды гаспадарчай дзейнасці – санітарныя высечкі або ачыстка лесу ад захламленасці – поўнасцю разбураюць гэты складаны экалагічны ланцужок.

«Выяўленне 14 месцаў росту стала практычным пацвярджэннем эфектыўнасці запаведнага рэжыму і эталоннага стану першабытных лясоў пушчанскага масіву», – падкрэслілі ў нацпарку.

«Любячая ружовы»

Спецыялісты расказалі, што навуковая назва грыба напрамую адлюстроўвае яго вузкую экалагічную спецыялізацыю. Пераклад лацінскага відавага эпітэта rhodophila гучыць як «любячая ружовы».

Асцеіна расце толькі на старых пладовых целах іншага рэдкага віду – губы ружовай, занесенай ў Чырвоную кнігу. У працэсе росту яе пладовыя целы набываюць далікатна-ружовае адценне, а спараносны слой мае трубчастую структуру з глыбокімі лабірынтападобнымі порамі.

У экасістэме асцеіна выступае дэструктарам другога парадку: яна садзейнічае гніенню адмерлых пладовых цел губы, паскараючы вяртанне арганічных рэчываў у лясны кругаварот.