Сыр, стыль і шмат музыкі: чым здзівіць галоўнае Купалле краіны ў гэтым годзе

Вялікае свята народных рамёстваў, музыкі і летняй весялосці на Магілёўшчыне парадуе гасцей трыма новымі пляцоўкамі.

Рэспубліканскі фестываль «Купалле» ў аграгарадку Александрыя Шклоўскага раёна пройдзе ў бягучым годзе ўжо ў 17-ы раз. Свята пачнецца 11 ліпеня ў 11:00 і прадоўжыцца да трох гадзін ночы наступнага дня.

Гасцей чакаюць выставы і падворкі беларускіх і расійскіх майстроў, стравы нацыянальнай кухні, канцэрт зорак эстрады Беларусі і Расіі, маладзёжная дыскатэка і салют.

Галоўнай гастранамічнай навінкай стане сырны фестываль. Буйныя малочныя вытворцы з усёй краіны прывязуць разнастайныя сыры і сырныя далікатэсы, якія можна будзе і прадэгуставаць, і купіць, дзеліцца падрабязнасцямі Шклоўскі райвыканкам.

Яшчэ адна фішка фестывалю – выставачны праект «Анталогія жаночай прыгажосці: ад традыцый да сучаснасці» – сумесная ініцыятыва канцэрна «Беллегпрам» і Магілёўскага абласнога краязнаўчага музея імя Раманава. Гледачам пакажуць, як мяняліся жаночыя ўпрыгажэнні і ўборы на працягу стагоддзяў. Некаторыя традыцыйныя строі можна будзе ўбачыць як на манекенах, так і на мадэлях у жывым дэфіле. Тут жа будзе працаваць выстава-продаж сучаснага адзення, тэкстылю і аксесуараў беларускіх вытворцаў.

Пляцоўку па развіцці нацыянальнага турызму прысвецяць маршрутам Магілёўскай вобласці, рэгіянальным санаторыям і прапановам па медыцынскім турызме. З дапамогай акуляраў віртуальнай рэальнасці гасцям прапануюць ажыццявіць віртуальныя экскурсіі па знакавых мясцінах рэгіёну.

Для зручнасці адпачывальнікаў побач з фестывальнай пляцоўкай абсталююць спецыяльную зону з драўлянымі лаўкамі і сталамі, а таксама фудкорты.

Галоўная сцэна свята будзе працаваць у рэжыме нон-стоп з 12 гадзін да позняга вечара. Па просьбах гасцей мінулых фестываляў партар перад ёй пашырылі з 300 да 600 месцаў.

Запальванне купальскага агню запланавана на 23:20, пасля чаго пачнецца дыскатэка.

Наша даведка

Першы фестываль «Купалле» ў Александрыі прайшоў у 2010 годзе. За гэтыя гады з мясцовага гуляння ён ператварыўся ў міжнародны форум, куды прыязджаюць тысячы гасцей.

На маляўнічым беразе Дняпра адпачываюць не толькі беларусы, але і расіяне. Нярэдка тут можна сустрэць гасцей з Кітая, Сірыі і нават Зімбабвэ. Мэта ва ўсіх адна – добра і смачна адпачыць, пры гэтым пазнаёміцца з культурай і традыцыямі нашай краіны.