Турніры ў Мінску і Маскве: «Дынама» прадставіла план перадсезоннай падрыхтоўкі

Ужо 15 ліпеня «зубры» пачнуць падрыхтоўку да новага сезона КХЛ, а 1 жніўня каманда збярэцца ў поўным складзе.

Мінскі хакейны клуб «Дынама» абнародаваў план перадсезоннай падрыхтоўкі – 15 ліпеня афіцыйна выйдуць з адпачынку і пройдуць паглыблены медагляд хакеісты з двухбаковымі кантрактамі (у асноўным гэта маладыя беларускія ігракі).

Пасля медагляду 1 жніўня пачнуць работу хакеісты з аднабаковымі пагадненнямі.

З 13 па 17 жніўня ў Мінску пройдзе перадсезонны турнір. «Зубры» на групавым этапе згуляюць з «Шанхайскімі драконамі» (13 жніўня) і магнітагорскім «Металургам» (15 жніўня). А 17 жніўня пройдуць стыкавыя матчы за выніковыя месцы з першага па пятае.

З 27 па 30 жніўня мінскае «Дынама» прыме ўдзел у Кубку мэра Масквы.

У стартавым матчы (27 жніўня) дынамаўцы згуляюць з казанскім «Ак Барсам». Наступныя сапернікі вызначацца па выніках першых гульняў.

Галоўны трэнер клуба, як і ўвесь штаб, пакуль не зацверджаны. Раней паведамлялася, што прыярытэтны напрамак пошуку – паўночнаамерыканскія спецыялісты.

Самым жаданым кандыдатам на пасаду коўча называўся Дамінік Дзюшарм. Канадскія СМІ паведамілі, што спецыяліст прыняў рашэнне застацца ў «Вегасе» на пасадзе асістэнта галоўнага трэнера.