У Беларусі вырасла колькасць донараў

У 2025 годзе кроў і яе кампаненты здалі больш за 100 тыс. чалавек.

У Беларусі зафіксаваны рэкорд па колькасці донараў, піша агенцтва «Минск-Новости».

Беларусь уваходзіць у лік краін з высокім узроўнем донарскай актыўнасці, расказаў дырэктар Рэспубліканскага навукова-практычнага цэнтра трансфузіялогіі і медыцынскіх біятэхналогій Фёдар Карпенка.

Па выніках 2025 года кроў і яе кампаненты здалі амаль 105 тыс. чалавек. Так, на тысячу жыхароў прыпадае 38,5–39 данацый, тады як сярэдні паказчык у развітых краінах складае каля 31.

Кожны год да донарскага руху далучаюцца каля 20 тыс. чалавек, якія здаюць кроў упершыню. У 2026 годзе тэндэнцыя захоўваецца: за першыя пяць месяцаў аб'ёмы данацый ужо перавысілі паказчыкі аналагічнага перыяду мінулага года.

Як адзначыў Фёдар Карпенка, донарства паступова становіцца часткай штодзённай культуры. Служба крыві актыўна працуе з ВНУ і каледжамі, праводзіць лекцыі і сустрэчы, дзякуючы чаму ўсё больш маладых людзей усвядомлена прыходзяць здаваць кроў.

Стаць донарам крыві і яе кампанентаў можа здаровы чалавек ва ўзросце ад 18 да 65 гадоў, у тым ліку іншаземец з відам на жыхарства, які пастаянна пражывае ў Беларусі. Сярод асноўных супрацьпаказанняў – сур'ёзныя захворванні, уключаючы перанесеныя інфаркты і інсульты, ВІЧ, гепатыты і туберкулёз.

Раней Times.by сустрэўся з ганаровымі донарамі крыві і даведаўся, як пачынаўся іх шлях.