Усім намастэ: Дзень ёгі сабраў у парках Мінска тысячы людзей

Ёга – гэта не пра ідэальныя асаны, а пра ўвагу да сябе. Гэта маленькі рытуал, які дапаможа і расслабіць мышцы пасля напружанага дня, і даць зарад бадзёрасці з раніцы.

Ёга стала адным з самых папулярных напрамкаў праекта «Спорт для ўсіх» у фармаце летніх трэніровак. Усе слоты на рэгістрацыю разабралі за пару гадзін.

Times.by шукаў гармонію і баланс у парку 50-годдзя Вялікага Кастрычніка.

Праект не толькі пра спорт і фізічную нагрузку, але і пра настрой і ўвагу да дэталей. Напярэдадні Міжнароднага дня ёгі – яго адзначаюць 21 чэрвеня – на ўсіх шасці лакацыях правялі незвычайныя практыкі пад жывую музыку.

«Гукі ханга і званочка кошы (яго яшчэ называюць музыкай ветру) дапамагаюць запаволіцца, адчуць момант, сканцэнтравацца на дыханні, якое ў ёзе мае вельмі важнае значэнне, – падкрэслівае трэнер Вольга Каваленка. – Гук робіць практыку больш аб'ёмнай».

Вольга выкладае ёгу ўжо 8 гадоў. Акцэнтуе, што гэту сістэму практык можна адаптаваць пад кожнага, незалежна ад узросту, фізічнай падрыхтоўкі і расцяжкі. У аснове ўсяго – хатха, якой больш за 2 тыс. гадоў.

Але свет мяняецца, і практыка заканамерна адаптуецца. Самых папулярных напрамкаў не менш за дзясятак: ад мяккай інь да актыўнай хот, якая прымушае мышцы папрацаваць не горш, чым на актыўным кардыя.

«Ёсць такі тэрмін «артха», перакладаецца як палова практыкавання, – тлумачыць трэнер. – І любую асану можна зрабіць як больш лёгкай, так і больш складанай. Таму фраза пра адаптацыю пад кожнага – не проста словы. Маім вучням ад 18 да 70 гадоў».

Вольга ў камандзе «Спорт для ўсіх» у фармаце летніх трэніровак ужо другі сезон. Успамінае, што на першыя заняткі прыходзілі 10–15 чалавек. Цяпер жа – поўны солд-аўт (на гэты канкрэтны было 30 слотаў).

Пры гэтым многія, хто не паспеў зарэгістравацца, прыйшлі са сваімі дыванкамі. Лана і Аляксандра як раз з такіх.

«Тут больш правільна сказаць, Лана паспела забраніраваць слот, а я ўжо «са сваім самаварам», – жартуе Аляксандра. – Для мяне такія заняткі на свежым паветры ўпершыню. Прывыкла, што спорт прадугледжвае залу, сцены, люстэркі. Але такі антураж – прырода, сонца, птушачкі шчабечуць – больш па душы. Асобная падзяка арганізатарам, што нават пры такой запаўняльнасці заўсёды можна знайсці месца і далучыцца да заняткаў».

Для Ланы гэты сезон праекта таксама першы. Расказвае, што даведалася аб ім з сацыяльных сетак. Паглядзела расклад і не задумваючыся запісалася на ёгу.

«Гэта выдатная магчымасць мякка прапрацаваць усе групы мышц, – адзначае суразмоўніца. – Праект маштабны і пры гэтым вельмі зручны – практычна ўсе лакацыі блізка ад метро. Асобнай увагі заслугоўвае арганізацыя: вельмі прафесійна, ідэальны варыянт для летняга адпачынку ўсёй сям'ёй. Каб кожны адцягнуўся ад экранаў смартфонаў або любімых дачных градак».

Парк 50-годдзя Вялікага Кастрычніка, напэўна, адзіная лакацыя, якая засталася нязменнай з мінулага сезона. Памочнік старшыні Прэзідэнцкага спартыўнага клуба Павел Ягораў удакладняе: перагледзелі ўсе пляцоўкі менавіта з ракурсу зручнай лагістыкі.

«Усе, за выключэннем пляжа №3 Цнянскага вадасховішча, размешчаны паблізу ад метро, – расказвае Павел Ягораў. – Каб усім удзельнікам, многія з якіх лічаць за лепшае дабірацца пешшу або на веласіпедзе, было камфортна перамяшчацца і падарожнічаць паміж пляцоўкамі».

На праект прыходзяць цэлымі сем'ямі, некаторыя яшчэ і хатніх гадаванцаў з сабой бяруць. Вопытныя трэнеры падбяруць комплекс практыкаванняў у залежнасці ад вашай фізічнай падрыхтоўкі і нават поўнай яе адсутнасці.

Дар'я прыйшла на ёгу з 4-гадовым сынам. Гаворыць, маленькаму Арцёму вельмі спадабалася, а асана «Сабака мордай уніз» і ўвогуле прывяла ў поўнае захапленне.

«Для мяне ёга – гэта новы свет, які адкрыла для сябе дзякуючы праекту ў фармаце летніх трэніровак «Спорт для ўсіх», – эмацыянальна дзеліцца ўражаннямі суразмоўніца. – У захапленні ад атмасферы, кампаніі, магчымасці правесці час з сынам, ды яшчэ на свежым паветры і з карысцю».

Дар'я ўпэўнена, што ёга – гэта напрамак, які абавязаны паспрабаваць кожны жыхар шумнага горада. Тут вучаць расслабляць мышцы, правільна дыхаць, запавольвацца, знаходзіць баланс, які ў быце часта губляецца. Гаворыць, вось такая гадзіна трэніроўкі – і гатовы зварочваць горы, але плаўна і гарманічна. Заяўляе, што абавязкова запішацца на пілатэс, джампінг, а адным з самых любімых напрамкаў праекта называе DanceMix.

Іван практыкуе ёгу ўжо не першы год, у тым ліку на праекце. Лічыць гэту практыку найлепшай фізічнай нагрузкай для пачатку дня. Тлумачыць, што менавіта яму вось такое паступовае нарошчванне нагрузкі – ад спакойнай расцяжкі да складаных асан – падыходзіць лепш за ўсё. Смяецца, маўляў, у канцы практыкі ў шавасане нават задрамаць можна. Каб лепш гулялася на валейбольнай пляцоўцы – гэта яго наступны крок па маршруце «Спорт для ўсіх» у фармаце летніх трэніровак у гэтыя чэрвеньскія выхадныя.

«У другім сезоне павялічылі колькасць як актыўнасцей, так і саміх трэніровак, – расказаў Павел Ягораў. – У мінулым, як правіла, было два заняткі ў гадзіну. Цяпер жа – чатыры. А ў зручныя гадзіны – гэта да і пасля паўдня, калі сціхае спёка, можа даходзіць да рэкордных 6–7 трэніровак у гадзіну. Ёсць мяккія, актыўныя, сілавыя, танцавальныя. Прыемную разнастайнасць уносяць заняткі для настрою. Настольны тэніс, пазлы, шашкі, дартс, кальцакід – не класічныя трэніроўкі, але прыемнае дапаўненне і магчымасць перавесці дух. Многія ўдзельнікі праводзяць на пляцоўках цэлы дзень у прамым сэнсе слова».

Толькі на гэтыя выхадныя – 20–21 чэрвеня – на шасці лакацыях праекта пройдзе 430 эксклюзіўных трэніровак. На іх зарэгістравалася амаль 15 тыс. чалавек. Для параўнання: у дэбютным сезоне мінулага года ва ўсіх напрамках прынялі ўдзел 20 тыс. чалавек.

У спісе новаўвядзенняў гэтага года – інклюзіўны гарадок, які з'явіцца на пляцоўцы праекта ў парку імя Паўлава ўжо ў ліпені. Тут запланаваны не толькі актыўныя напрамкі – адаптыўная фізкультура, рухавыя гульні з мячом.

«Будзе і комплекс мерапрыемстваў псіхатэрапеўтычных, карэкцыйных для грамадзян з асаблівасцямі псіхафізічнага развіцця, – удакладніў Павел Ягораў. – Прынялі рашэнне перамясціць фармальную кабінетную работу на свежае паветра».

Суразмоўца падкрэслівае: многія лакацыі праекта ўжо са старту адаптаваны для людзей з абмежаванымі магчымасцямі. Тлумачыць, што такі інклюзіўны складальнік дапамагае прапрацаваць пытанні талерантнасці сярод нашага грамадства. Прыводзіць у прыклад парк 50-годдзя Вялікага Кастрычніка, дзе ў першыя выхадныя праекта адбыўся турнір па баскетболе, або парк Паўлава, дзе ў другія выхадныя чэрвеня прайшоў футбольны батл з удзелам руху Special Olympics – арганізацыі, якая займаецца сацыяльнай рэабілітацыяй людзей з асаблівасцямі псіхафізічнага развіцця праз заняткі спортам.

Нагадаем, «Спорт для ўсіх» у фармаце летніх трэніровак – гэта праект Прэзідэнцкага спартыўнага клуба і Мінгарвыканкама, які дэбютаваў у 2025-м.

У гэтым годзе сезон адкрылі 5 чэрвеня. Інфапартнёр праекта Times.by расказваў, дзе ў сталіцы размясціліся пляцоўкі, але для замацавання паўторым:

• парк 50-годдзя Вялікага Кастрычніка;
• парк імя Паўлава;
• сквер каля гасцініцы «Беларусь»;
• пляж №3 Цнянскага вадасховішча;
• Яблыневы сквер на вуліцы Каліноўскага;
• парк Цівалі.

Заняткі праходзяць кожныя выхадныя з 10 раніцы да 20 вечара. Завершыцца чатырохмесячны спартыўны марафон 27 верасня.