Містыка ў «Смалявудзе»: бегуноў і веласіпедыстаў клічуць на купальскія старты сярод кінадэкарацый

Спаборніцтвы ў гэтым годзе адбудуцца ў зусім новай лакацыі: будуць і балоты, і лясы, і палі, і пясчаныя ўзгоркі.

Фестываль «Купалле-2026» у гэтым годзе кардынальна мяняе лакацыю. Аматараў спорту і экстрыму запрашаюць правесці выхадныя 11–12 ліпеня на знакамітай натурнай пляцоўцы «Беларусьфільма» – «Смалявудзе», паведамляе Федэрацыя прыгодніцкіх гонак.

Гэта маляўнічая здымачная пляцоўка пад адкрытым небам, размешчаная каля вёскі Каменка (у 45 км ад Мінска).

«Гасцей чакаюць маляўнічыя, хоць і крыху дзікія пейзажы – балоты, лясы, палі і пясчаныя ўзгоркі, а таксама дэкарацыі натурнай пляцоўкі кінастудыі «Беларусьфільм», якія стануць выдатным фонам для фота», – абяцаюць арганізатары.

Прыняць удзел у фестывалі могуць як дарослыя, так і дзеці.

Паколькі старты прымеркаваны да Купалля, усе дыстанцыі будуць ахутаныя атмасферай беларускіх легенд. Спартсменам прапануюць выбраць, да каго з міфічных «нячысцікаў» яны адправяцца ў госці.

Для начных велагонак падрыхтаваны дыстанцыі «Цёмны Бадзюля» каля 25 км і «Дзве Бадзюлі» ў два кругі прыкладна на 50 км. Начныя трэйлы прадстаўлены дыстанцыяй «Аржавень» на 15 км і больш кароткім раўнінным «Начны Блуд» на 7 км.

Для дзённых стартаў даступныя дзіцячы трэйл «Хохлік» на 1 км, узгорысты «Горны Блуд» каля 7 км, балотны «Багнік» на 25 км, а таксама дзённая велагонка «Светлы Бадзюля» даўжынёй прыкладна 25 км.

Самыя трывалыя змогуць выпрабаваць сябе ў двухэтапных гонках: «Вялікі Бадзюля» ўключае начны этап на 50 км і дзённы – на 25 км па той жа трасе, а «Вялікі Блуд» – гэта трэйл з начнога і дзённага этапаў па 7 км кожны, але ўжо па розных трасах.

На фінішы кожнага ўдзельніка чакае памятны медаль, духмяная гарачая гарбата, традыцыйны кісель, фрукты і пачастункі. А вечарам у стартавым гарадку распаляць велізарнае купальскае вогнішча.

Падаць заяўку і выбраць сваю дыстанцыю можна на афіцыйным сайце Федэрацыі прыгодніцкіх гонак.

А пазнаёміцца больш падрабязна з усімі міфічнымі істотамі і даведацца, дзе яны жывуць у Беларусі, вы можаце ў нашым спецпраекце.