На дыстанцыі нават тата з чыхуахуа: вялікі сямейны забег прайшоў у Мінску

Вялікі сямейны забег «Дзяцінства на старце!» сабраў дзясяткі дзяцей і іх бацькоў у парку імя 50-годдзя Вялікага Кастрычніка 7 чэрвеня.

Times.by высветліў, хто ў беларускіх сем’ях бегае ад душы, а каму даводзіцца займацца спортам за кампанію.

Дартс, шахматы і шашкі, настольны тэніс, танцы і, вядома, дыстанцыя для бегу – парк 50-годдзя Кастрычніка змяніўся ў першыя выхадныя чэрвеня. Аналагічныя спортпляцоўкі арганізавалі па ўсім Мінску ў рамках праекта «Спорт для ўсіх».

У суботу мы ўжо паглядзелі, як займаюцца спортам мінчане каля гасцініцы «Беларусь». У нядзелю прыйшлі пабалець за ўдзельнікаў вялікага сямейнага забегу.

Стартаў сёння некалькі. Першы – сямейны, дзе ўдзельнічаюць бацькі разам з дзецьмі. Дыстанцыя – 500 м. Хлопчыкам і дзяўчынкам ад 10 да 15 гадоў прапануюць бегчы самастойна 1 км – без дарослых. Пры гэтым дзяўчынкі і хлопчыкі спаборнічаюць асобна і ў розных узроставых катэгорыях: 10–12 і 13–15 гадоў.

«Мы ўдзельнічаем ужо другі год. У мінулым годзе бегла я з дзецьмі, а ў гэтым усе разам пабяжым, нават наш тата, – кажа Ганна. – Ён на самай справе не планаваў бегчы, але вядучы ўбачыў нашага малодшага члена сям’і – чыхуахуа Мілку – і прапанаваў наклеіць нумар і яму».

Мілка вельмі маленькая, і яе могуць затаптаць, таму галава сям’і пабяжыць з ёй на руках. Калі людзей вакол будзе менш, сабаку плануюць спусціць на зямлю і фінішаваць адначасова ўсёй сям’ёй, узяўшыся за рукі.

А пакуль мы знаёміліся, дарослыя і дзеці ўжо пастроіліся на старце. Дружна палічылі ад 10 да 1 і рушылі ўслед за накіравальнікам.

Вадзім з сынам Даніілам фінішавалі трэцімі.

«Сын займаецца лёгкай атлетыкай, а я бегаю для сябе. Дачка таксама спартсменка, будзе сёння выступаць у асобнай намінацыі. Жонка – заўзятарка, далучацца не плануе, ды мы і не настойваем. У «Спорце для ўсіх» удзельнічаем упершыню, але мы бегалі не раз у іншых праектах», – расказаў Вадзім.

Мужчына перакананы, што дзяцей трэба прывучаць да спорту, падаючы асабісты прыклад. У адваротным выпадку нічога не атрымаецца. За перамогай сям’я не гналася, бег для іх – задавальненне.

Ірына проста ўлюбёная ў бег, разам з сяброўкай трэніруецца 2–3 разы ў тыдзень, гэтымі днямі вярнулася з забегу «Першых» у Брэсце. Дамачадцы Ірыну падтрымліваюць, хоць і са стрыманым энтузіязмам.

«Я стараюся ўцягваць да бегу ўсю нашу сям’ю. Не заўсёды атрымліваецца, – смяецца яна. – У мінулым годзе мы таксама ўдзельнічалі ў сямейным забегу «Спорт для ўсіх». Ды і паўмарафон бегаем».

У некаторых сем’ях галоўныя спартсмены – дзеці. Напрыклад, пераможніца забегу сярод дзяўчынак 10–12 гадоў Дар’я. «Я займаюся біятлонам і валейболам. Сюды прыехала за перамогай», – сказала як адрэзала дзяўчынка. Уся сям’я Дашы прыехала з ёй з Бешанковіцкага раёна, каб падтрымаць.

«Усталі ў пяць раніцы, каб своечасова прыехаць, – расказаў бацька ўдзельніцы. – На сямейны забег не паспелі, ды і мы больш гульнявыя віды спорту любім».

Сярод хлопчыкаў 13–15 гадоў упэўнена перамог Мікіта. Яму 14 гадоў, але гэта не першая яго ўзнагарода, сярод іншых у яго актыве – другое месца Рэспубліканскіх спаборніцтваў па лёгкай атлетыцы.

Прызёрам, якія занялі 1-е, 2-е, 3-е месца ў кожнай намінацыі, уручылі падарункі ад арганізатараў – Прэзідэнцкага спартыўнага клуба.

Times.by – медыяпартнёр праекта «Спорт для ўсіх».